مفيش حاجة اسمها ورد.. ياسمين عز لـ الأزواج: الراجل الصح لازم إيد مراته تشخلل من كتر الغوايش والدهب

وجهت الإعلامية ياسمين عز نصيحة للأزواج في عيد الحب، بطريقتها الساخرة المعتادة، قائلة: “مفيش حاجة اسمها ورد، لغوا الورد”.

وأضافت ياسمين عز خلال تقديمها برنامج “كلام الناس” المذاع عبر قناة MBC مصر: “منذ اختراع الذهب والألماس لغوا الورد، الورد الأحمر يا مدام هدية تكميلية ملوش لازمة وبيجيب حساسية ويشفط الأكسجين من البيت”.

وتابعت: “الشيكولاتة الحمرا بتتخن وبتجيب حساسية، دباديب حمرا؟ هي مش في حضانة يا حبيبي”.

وتابعت: “كلنا عارفين إن الراجل ميعرفش في حياته حاجة حمرا غير تيشيرت الأهلي، خليكي ناصحة يا مدام وغيري الألوان وبلاش أحمر، أخضر أو أصفر، والأخضر هنا رمز الدولار، والأصفر رمز معدن الذهب”.

وأردفت: “إنت هتجيب لها النهاردة كرسي جابر ينور في رقبتها، دهب زينة وخزينة لها ولعيالك وللبيت، ولو كرسي جابر غالي عليك ولا يهمك، ظرف فيه 10 آلاف جنيه أو 10 آلاف دولار أيهما أقرب، شيك على بياض أو وصل أمانة، كردان دهب صغيرون زي بتاع جدتك، أو خاتم ألماس بسيط 2 جرام أو 2 جرام ونص، لازم تنور إيدها الشقيانة بخاتم يفرحها، وبالنسبة للورد هاته لمامتك هدية جميلة ومزية”.

واختتمت: “الراجل الصح لازم إيد مراته تشخلل من كتر الغوايش والدهب، عايزة إيدها توجعها من تقل الغوايش عيار 24، ولو في عيار 34 هاته، وما تنساش تدلع مراتك بكلام رومانسي علشان تفتكرك بدعوة حلوة لما تموت بعد الشر عليك”.