أميرة عبدالهادي
حلَّ الفنان شريف رمزي ضيفًا على الإعلامية إنجي علي ببرنامج “أسرار النجوم” المذاع على إذاعة “نجوم FM”.
وكشف رمزي خلال اللقاء عن تأثير الأدوار العاطفية التي قام بتجسيدها في أفلامه عليه، قائلًا: “عشت قصص حب في الأفلام بتوصل لمرحلة لو في قصة حب في فيلم لازم تتوحد مع الشخصية اللي بتقدمها وتحس أنك فعلا أنت الشخصية دي ولو الشخصية بتحب بطلة في أوقات مش ببقى عارف أنا بحبها عشان المفروض بحبها ولا بحبها بجد ولا دا عشان الدور، بيبقى في اختلاط كده إلى أن الفيلم بيخلص الواحد بيرجع لحياته الطبيعية”.
وأضاف: “أثناء ما الممثل أو النجم بيشتغل لو في قصة حب بينه وبين واحدة هو بيحس ساعتها أنه بيعيشها بجد أنا من أول فيلم “أسرار البنات” كان في قصة حب لمراهقين، طول ما أنا شغال أنا بحب البنت دي”.
وتابع: “أنا حبيت كل البطلات اللي اشتغلت معاهم، أي بطلة أنا اشتغلت معاها وحبيتها في العمل أنا حبيتها يمكن في الحقيقة أو حسيت أثناء وإحنا شغالين إني حبيتها بجد بعد شوية الموضوع بيخلص”.
وعن أكثر قصة حب في عمل قدمها وكان معجبا بها قال شريف رمزي: “أكتر قصة حب قدمتها وكانت مختلفة وحبيتها كان فيلم “أسرار البنات” كانت نقية جدا ولد وبنت بيحبوا بعض والمجتمع والظروف والسن والأهل بتبعدهم عن بعض”.
وكشف شريف رمزي عن رأيه في الحب في سن صغير وقال: “في مجتمعنا عادة نستعيب الحب في أعمار معينة، أنا أولادي لو جم قالولي أنهم بيحبوا هبقى طاير من الفرحة مش هحس أن بدري عليك هبقى حابب أنهم يحسوا الأحاسيس دي وهما صغيرين دي حاجة صحية، عمري ما هقول المذاكرة أهم الحب بأهمية المذاكرة والأكل والشرب والرياضة حاجة طبيعية لازم يعيشها حاجة حلوة المفروض يحسها من سن صغير”.
