بسبب العصبية.. أحمد فهمي يكشف لأول مرة تفاصيل خضوعه لعملية قلب مفتوح

تحدث الفنان أحمد فهمي عن تفاصيل أزمة صحية تعرض لها في عام 2016 نتج عنها خضوعه لعملية قلب مفتوح، الأمر الذي جعله يغير طريقة تفكيره في الحياة.

وقال أحمد فهمي خلال لقائه ببرنامج “كلام نواعم”: “بحب أوي اهتم بجسمي  وأروح الجيم وأكل كويس، وفي 2016 كنت أول مرة اشتغل مسلسل لرمضان وأخلص قبل رمضان عادة بنخلص تصوير في رمضان، خلصت قبله بكام يوم وأنا بحب الحلويات أوي ورمضان بقى كنافة وقطايف لقيت نفسي بزيد على الميزان قلت أروح للدكتور عشان أظبط الأكل، وهو بيكشف عليا عمل ريأكشن كده حاول ميبينوش بس أنا فهمت وطلب مني تحاليل”.

وأضاف: “عملت التحاليل رجعت له قالي أنت عندك حاجة في القلب قلت له إزاي المفروض أحس بأعراض، قالي محتاجين نكشف، كشفت في حاجة اسمها الصمام الميترالي عندي فيه قطع بسبب العصبية، سافرت وعملت عملية قلب مفتوح في إنجلترا فجأة في اللحظة دي شفت الحياة بمنظور مختلف تماما”.

وتابع: “الدكتور وهو معايا دخلنا أوضة العمليات عشان يشرحلي قالي السرير ده أنت ممكن بعد ساعتين تقوم وممكن لأ بيتكلم عادي أنا مأخدتش الكلمة أنها حاجة وحشة وأخدتها بطريقة إيجابية بس من اللحظة دي بقيت بشوف الحياة بمنظور مخالف وأن الواحد بيلهث على أشياء ممكن تكون مش مهمة أوي”.