شوبير: إمام لم يتجاوز في حق أحد أو نادي.. وعطية الله سيخضع لعملية جراحية

علق الإعلامي أحمد شوبير، عن طريقة احتفال إمام عاشور لاعب الفريق الأول لكرة القدم بالنادي الأهلي، بعد إحرازه هدف في مرمي سموحة بالدوري الممتاز.

وقال شوبير خلال تصريحات تليفزيونية، عبر برنامج “حارس الأهلى”، المذاع علي قناة النادي: الدنيا قامت ومقعدتش على احتفال امام، الحقيقة انا شفته لا عيب ولا حرام.

وتابع: إمام لم يخرج عن النص أو يتجاوز في حق أحد أو نادي، جاب جول حلو اوي ورجل المباراة، ارقامه السنة دي مع الأهلي ماشاء الله مسجل 3 أهداف وصانع 3.

وواصل: هما عايزين يعملو في امام زي اللي اتعمل في كهربا في عز تألقه لما كان هيتشطب واتوقف ساعتها ، احنا هنقعد نحاكم اللاعيبة في احتفالاتها؟.

وعن صفقات النادي، كشف شوبير: كولر لما طلع وقال مجاليش تدعيمات هو مغلطش.. بتاريخ 24 ديسمبر الاهلي كان خلص صفقة مهمة اوي من العيار الثقيل وبمبلغ كبير ،وفجأة النادي الاهلي لقى النادي بيغالي في الطلبات.. والاهلي وصل ساعتها لمبلغ كبير لم يصل إليه اي نادي في مصر وبالفعل كان هيدفع.

وأضاف: الاهلي اتفاجئ ان المبلغ الكبير دا اللي محصلش في مصر اتضرب في اتنين ، الاهلي قرر حاجتين نعمل انتظار على الصفقة دي، وقرر بقى ان السرية والكتمان التام ان مفيش بني ادم يعرف على الصفقات بعد كدة واتقال لكولر احنا مش هنقولك إلا واحنا بنخلص مع اللاعيبة واصبح الامر في اطار ضيق جدا جدا لا تتخيلوها.

وعن يحيي عطية الله، أتم: يحيى يخضع لعملية جراحية صباح الخميس بعد اصابته في بكسر في عظام الوجه وكسر في الاسنان.