محمود سعد يتحدث عن حياته وهواياته بعيدًا عن الشهرة

شارك الإعلامي محمود سعد جمهوره جزءًا من أفكاره الشخصية وهواجسه التي تشغله منذ سنوات، وذلك من خلال مقطع فيديو نشره عبر حسابه الرسمي على موقع “إنستجرام”، كشف فيه عن سؤال يلاحقه دائمًا: “أنت ليه لسه بتشتغل؟”.

وقال في الفيديو: “دا السؤال اللي دايمًا بفكر فيه… أنا كان عندي أفكار أساسية إن الواحد بييجي عند مرحلة معينة بيتمنى بعدها يطول العمر ويعيش حواليك، كنت أتمنى لما أكبر أكون متفرغ لحاجة تانية غير الشغل، غير الكاميرا وغير التصوير وغير الكتابة وكل دا. كنت أحب أبقى في حالي وأعمل الحاجة اللي كنت بحبها وأنا صغير وأخلص ليها أكتر.. كنت هقول لنفسي، هي دي رغبتك الحقيقية؟ وهل أنت صادق ولا بتقول لنفسك كدا وبرضو بتشتغل؟ لدرجة إن الواحد ساعات مش بيبقى فاهم نفسه ولا إيه الحكاية”.

وتوقف الإعلامي محمود سعد عند أمنيته الأقرب لوجدانه، موضحًا: “أنا نفسي جدًا أتوقف عن كل حاجة وأعمل حاجة واحدة بحبها، وهي مش مسألة الحلال والحرام والجنة والنار.. بس أنا بحب قعدة الجامع جدًا، ومن أجمل الحاجات اللي بتطربني صوت الأذان، عشان كدا أي مكان بسكن فيه بكون حريص يكون فيه جامع قريب، عشان أسمع صوت الأذان، وأنا مش متدين أوي، بالعكس، بعمل أخطاء وبعمل كل حاجة، بس بحبه واتربيت عليه من وأنا صغير، وكان في جمب بيتنا شيخ بيأذن كأنه معايا جوا البيت”.

وتساءل مرة أخرى عن السبب الذي يمنعه من تحقيق رغبته قائلاً: “طب ليه مبعملش كدا؟ جايز عشان ظروف المعيشة. بس السؤال دا دايمًا في دماغي.. طب هل أنا بحب الكاميرا؟ لا، طب هل بحب أطلع في التليفزيون؟ لا، طب يبقى أنا بكذب على نفسي؟ لا، أنا صادق مع نفسي، هل حد من المشاهدين عنده نفس الأفكار دي؟”.

واختتم محمود سعد حديثه مؤكدًا ابتعاده عن مظاهر الرفاهية أو السعي وراء الكماليات، قائلاً: “اللي يعرفني كويس يعرف إني معنديش أي تطلعات طبقية، مثلًا معنديش رغبة أركب مركب أو أتعشى بره أو أسافر، أنا الحمد لله مقتدر، بس أنا مش عايز كدا”.