هبة أحمد
تحدثت الفنانة منى زكي بصراحة عن نظرتها لفكرة عمليات التجميل مع تقدم العمر، مؤكدة أنها تسعى حاليًا لتقبل المرحلة العمرية الجديدة والتعايش مع التغيرات الطبيعية، وكشفت عن روتينها في العناية بالبشرة، كما تطرقت لعلاقتها بابنتها لي لي أحمد حلمي.
وقالت منى زكي خلال لقائها مع الإعلامية عبلة أسامة في برنامج “عندك وقت مع عبلة” على قناة MBC: “كنت أنا وأصحابي من فترة وصلنا لقرار إننا هنحاول نتقبل السن ونتعايش، وبعد يومين قابلت زميلة أول حاجة قالتهالي: إنتي محتاجة تعملي عملية شد بسرعة.. قلتلها حرام عليكي، ده أنا بحاول أتقبل الوضع.. طبعًا هي هزتني، لكني عايزة أفضل أحاول أتقبل السن والمرحلة”.
وعن روتينها للعناية ببشرتها، تابعت منى زكي قائلة: “كنت في فترة بحط كريمات لكن حصلي إكزيما، فبقيت أحط زيوت. ودلوقتي بحط ماية رز على وشي، وبعدها زيت لبان الدكر مع زيت أفوكادو، وبعمل ماساج معين في وشي ويوجا”.
كما تحدثت منى عن علاقتها بابنتها الكبرى لي لي، مشيرة إلى أنها تعتبرها أكبر تجربة أمومة في حياتها، وقالت: “بنتي أكتر واحدة ربيتها الحمد لله، والواقع إنها أمّ لإخواتها.. واخدة مني تقبل الآخر بسهولة، وعملية وعايزة تشتغل من وهي صغيرة، واخدة من أحمد خفة الدم.. وهي اختارت كل حاجة في حياتها”.
وكشفت منى عن مشاعرها القوية تجاه سفر ابنتها، قائلة: “من كتر ما أنا متضايقة إنها مسافرة، كنت عصبية جدًا على كل الناس، ولغاية قبل ما أمشي بيوم من عندها انهارت من العياط، وبقيت أقولها كلام كأني مش هشوفها تاني”.
