هبة أحمد
كشف الفنان ماجد الكدواني عن التحولات الكبيرة التي شهدتها شخصيته على مر السنوات الماضية، مشيرًا إلى أنه أصبح أكثر هدوءًا واستقرارًا بعد فترة من العصبية والضغوط، وقال خلال لقائه مع الإعلامية لميس الحديدي في برنامج “الصورة”: “زمان كنت شخصية تانية وكانت حياة صاخبة جدًا، وكنت عصبي وسريع الغضب الشديد على أقل حاجة، وكنت أحيانًا ممكن أكسر حاجات حواليا، وكان ضغط أعصاب وقلة خبرة في الحياة، واللي غيرني أني شبعت من اللي شفته وهل أنا موافق على هذه الحياة وبهري في نفسي وبس، ولما شفت الحياة الأخرى قلت تعالى نغير”.
وكشف ماجد الكدواني عن نصيحة والده له، معلقاً: “لما أنا اتغيرت اللي حواليا اتغيروا، وعرفت أني مش سعيد ومش مرتاح بسبب إيه، ولما غيرت نفسي ارتاحت واللي حواليا ارتاحوا، ودي كانت نصيحة واحد قد أبويا”.
وتطرق ماجد الكدواني إلى دور العائلة في حياته، موضحًا: “فكرة العائلة حلوة أوي، وأحب أعيش في سلام طول الوقت والحسم بالراحة وناخد رأي بعض ونشوف إيه الصح اللي يتعمل”. وأكد: “طبعًا الأب بيحتاج في بعض الوقت يكون حاسم جدًا، لما ساندرا بنتي تعبت من المدرسة وقلت هتتنقل يعني هتتنقل، وهي كانت ميتة من العياط علشان هتسيب أصحابها، ولكن قلتلها ده للخير ولازم تتنقلي والحمد لله طلعت للخير، فيه مواقف في الحياة لازم تكون حاسمة”.
