محمد ممدوح: “دخلت التمثيل بالصدفة.. ولقبت بـ “تايسون” عشان نفسي قصير”
هبة أحمد
كشف الفنان محمد ممدوح عن سر إطلاق لقب “تايسون” عليه خلال لقاءه في برنامج “فضفضت أوي” مع المخرج معتز التوني، موضحًا أن السبب لا يعود لقوته بل لمشكلة لديه في التنفس.
وقال محمد ممدوح: “الملاكمة خدت جزء صغير من وقتي، مش تايسون عشان قوي زي تايسون، عشان نفسي قصير زي بيج تايسون، أنا عندي مشكلة في نفسي، بيج تايسون نفسه قصير جداً، بس هو عايز يخلص وهو كسبان، وأنا عايز أخلص عشان زهقان وعرقان، إيه الرياضة المنيلة خرجوني من هنا”.
وأكد محمد ممدوح على أنه ورث من والده حب التجربة والالتزام الكامل بأي شيء يخوضه، قائلًا: “أنا في حاجة واخدها من أبويا كده، إن لما تحب تجرب حاجة تجرب كل قوانينها، استمتع، شوف عاوز تقعد للآخر، حبيت أكمل، محبتش أمشي، أنا حبيت بس لما دخلت في التمثيل حبيت أكتر”.
وتحدث ممدوح عن بداية دخوله عالم التمثيل معلقاً: “كنت رايح لواحد صاحبي، اسمه محمد خالد، أستاذ تمثيل ومعد موسيقي، وكنت رايح له في تانية ثانوي في إجازة نص السنة، كنت متخرشم حاجبي مفتوح، كان عندي ماتش، وكسبته، بس العيال اتلموا عليا وضربوني بعد الماتش، محمد خالد قالي تعالى المسرح، فدخلت المسرح وانبهرت، شوفت مشهد بيتعرض عن القضية الفلسطينية، بالكلام أثر فيا جداً، دمعت وقشعرت”.
وأردف: “لقيت نفسي، طب ما أجرب التمثيل، وبعد كده حبيت الشباب أوي، محمد خالد قال يلا نعمل فرقة، وبدأنا نذاكر ونقرأ كتب عن التمثيل أو روايات أو مسرح”.
وختم ممدوح حديثه معترفًا أنه كان قبل دخوله مجال التمثيل كان يصعب عليه التعبير عن ذاته قائلاً: “اكتشفت إني مبعرفش أعبر عن نفسي، والتمثيل هو اللي بيخليني أعبر عن نفسي”.
