محمد ممدوح: “كنت بليد في ثانوية عامة.. وكان بيجيلي استدعاء ولي أمر ومكنش بيلحق يوصل البيت”

استرجع الفنان محمد ممدوح ذكريات فترة دراسته في الثانوية العامة، موضحًا أنه لم يحضر للمدرسة خلال الصف الثالث الثانوي غير أربعة أيام فقط، جاء ذلك خلال استضافته في برنامج “فضفضت أوي” مع المخرج معتز التوني، حيث روى ممدوح تفاصيل تجربته الدراسية قائلاً: “أنا مبحبش المدرسة خالص، مكنتش شاطر وبقيت بليد في ثانوية عامة، قبل الثانوية كنت خدت جزء من المدرسة وأنا في الكويت، بعد كده جيت على هنا وكملت، جيت عيدت سنة تانية في ثانوي”.

وأضاف: “كان في استدعاء ولي أمر، قبل كده كنت لامم الدنيا، كنت بلعب رياضة ساعتها حديد، وكارتيه، وكنغ فو، وبوكس”.

وتحدث محمد ممدوح عن تفاصيل مشواره الدراسي، قائلاً: “ثانوية عامة 3 سنين خدتهم في سنة ونص، خدت أولى ثانوي كلها، السنة التانية في تانية ثانوي دخلت الترم الأول والترم التاني مدخلتش ولا يوم، تالتة مدخلتش غير أربع أيام، كل يوم بنزل من البيت رايح المدرسة بس مكنتش بروح”.

وأشار محمد ممدوح إلى أنه كان دائمًا يتلقى استدعاءات لولي الأمر بسبب غيابه المتكرر، قائلاً: “كان بيجيلي استدعاء ولي أمر مكنش بيلحق يوصل البيت وقع مرة في إيد أخويا الكبير بس مرضيش يطلعه البيت بس قفش عليا قفشة وجالي المدرسة”.

يُذكر أن محمد ممدوح يستعد لطرح فيلمه الجديد “روكي الغلابة” المقرر عرضه في 30 يوليو الجاري، ويشارك في بطولته كل من دنيا سمير غانم، محمد رضوان، ومحمد ثروت، ومن إخراج أحمد الجندي.