ردت الفنانة مي عمر على الانتقادات التي وجهت لمسلسل “إش إش”، بشأن إنه لا يقدم فن هادف، قائلة: “يعني ايه فن هادف؟ الفن أنواع كتير اوي، في ممكن يبقى فن واحد بيقدم مسلسل كوميدي، هل دا مش فن؟ ما هو رسالته إنه بيضحك، بمجرد إني اتفرج عليه واضحك هو كدة أدى رسالته”.
وأضافت مي عمر خلال لقائها ببرنامج “الحكاية”، مع الإعلامي عمرو أديب: “أنا بقى عايز أقول رسالة لازم يبقى من خلال محتوى مسلي، لو عايز تقدم توعية باحته يبقى ممكن يفتح وثائقي، فكرة إن أنا أقول عايزة أوصل رسالة، ممكن أوصل رسالة مش غلط، ممكن تبقى أنا رسالتي إني اسلي الناس، وفي رسايل كتير في المسلسل على فكرة، بس في ناس للاسف عندها خلط إن العمل الجماهيري ماينفعش يبقى عمل فني، وأنا معرفش ليه الفكرة دي متاخدة عندنا يعني لما بيلاقوا مسلسل أو فيلم نجح جماهيريا مايخدش جوايز أو دا مش فن، مع إن برا العكس تماما”.
وتابعت: “هل فيلم “تايتنك” مش عمل فني رائع؟ مخدش كل الجوايز اللي ممكن نتخيلها، هل إنه جاب ايرادات دا منعه من عمل فني، ليه عندنا دايما طالما جماهيري وعجب الناس يبقى مش عمل فني، أنا أهم حاجة عندي الجمهور في الأول وفي الأخر، مماينفعش حد يقول لي أنا مش فارق معايا الجمهور، هي في الأول وفي الأخر للجمهور، لازم تعجب الجمهور، لازم أبقى أنا مقتنعة بيها عشان وحاسة بيها عشان الناس تحبها، واكيد كلنا هدفنا تعجب الجمهور وتحقق نسب مشاهدة عالية وماينفعش حدي قول لي انا مكنش هدفي اني احقق نسب مشاهدة عالية”.
