أميرة عبدالهادي
ردت الفنانة لوسي، على تصريحات الفنان حمادة هلال التلفزيونية، والتي كذب فيها تصريحاتها بشأن وجود جن في موقع تصوير “المداح”، مؤكدة أنها تمتلك أدلة على كلامها.
وقالت لوسي خلال لقاءها ببرنامج “تفاعلكم”، المذاع عبر فضائية “العربية”، “أنا زعلانة جدًا من حمادة هلال هو كذبني وقال أن مفيش جن في موقع تصوير المداح، حمادة هلال ما يعرفش إني قرأت عن عالم الجن قبل تقديم شخصية “الجنية هند بنت الأحمر” في مسلسل “المداح” السنة اللي فاتت”.
وأشارت لوسي إلى تعرضها لبعض المواقف الغريبة، خلال توجهها إلى موقع التصوير داخل إحدى الفيلات ليلًا وكانت الأجواء هادئة، ثم فوجئت بعاصفة شديدة للغاية بمجرد وقوفها داخل المكان المخصص للتصوير.
وأكدت أن الآلة الرافعة المخصصة لنقلها إلى أعلى الجبل تعطلت قبل تصوير المشهد، الأمر الذي دفعها لاقتراح وضع سلالم عادية وصعودها؛ حتى لا يتعرض العاملون لخسارة مادية كبيرة.
وتابعت: “حمادة هلال وهو بيسلسل الجنية بقيت أجعر واتصلبت في الأرض، وكان معانا شيخ بيرش ماية حواليا ويقرأ قرآن، ومكنتش سامعة حاجة غير صوت تأوه، أنا أخدت على خاطري عشان بيقول أصل الدنيا برد وهي كانت بردانة، لا بردانة إيه! المواضيع دي حصلت لنا كدة، وفعلًا كان فيه جن أثناء التصوير”.
وأردفت: “وعايزة أقول بالمناسبة أن حتى الجن الشرير أضعف من الإنسان بكتير هو كبيره يستخدم الإنسان علشان ينفذله حاجات أو يكسر إيده أو رجله أو يجيبله شنطة فلوس، ودايمًا بيختاروا الناس اللي نفوسهم ضعيفة زي الدجالين والناس اللي بتعمل أعمال”.
واختتمت: “إحنا كنا شغالين في الموقع بتاعهم مكان مهجور وجبال وفجأة تلاقي قطط وكلاب غريبة جدًا حواليكي، بس علشان كنا كلنا بنقرأ قرأن كانوا بيتجنبونا إلى حد ما”.
